ئۆکتۆبەرفێست لە میونشن؛ ئاوێنەیەک لە کەلتووری بایرن+وێنە

میونشن – ئەڵمانیا: گەورەترین جەژنی جەماوەری جیهان ئەمساڵیش لە ۲۰ی سێپتەمبەر تا ۵ی ئۆکتۆبەری ۲۰۲٥ لە گۆڕەپانی Theresienwieseی میونشن بەڕێوەدەچێت. ئەم جەژنە کە مێژووەکەی بۆ زیاتر لە دووسەد ساڵ دەگەڕێتەوە، تێکەڵەیەکە لە نەریتەکانی بایرن، مۆسیقای ناوچەیی، پۆشاکی فۆلکلۆر و خواردنە تایبەتەکانی ناوچەکە، و ساڵانە ملیۆنان کەس لە سەرتاسەری جیهان کۆدەکاتەوە.

دەستپێکی فەرمی بە نەریتێکی مێژوویی

ئۆکتۆبەرفێست بە لێدانی چەکوش لە یەکەمین بەرمیل خواردنەوەی جەژنەکە لەلایەن شارەداری میونشنەوە دەست پێدەکات. ساتێک کە بە هاواری بەناوبانگی “O’zapft is!” (بە واتای “کرایەوە!”) یاوەری دەکرێت و دەنگی تۆپەکان سەرەتای جەژنەکە بۆ خەڵک ڕادەگەیەنن.

ئامار و ژمارەکان
لە ساڵی ڕابردوو (۲۰۲٤) نزیکەی ٦.۷ ملیۆن کەس بەشداری جەژنەکەیان کرد و زیاتر لە ۷ ملیۆن لیتر خواردنەوەی کحولی بەکارهێنرا.

جەژنەکە ۱٤ خێوەتی گەورە و ۲۰ خێوەتی بچووک لەخۆدەگرێت کە هەر یەکێکیان بە ڕازاندنەوە و نەریتی تایبەتی خۆیەوە ڕەنگدانەوەی کەلتووری بایرنن.

بەکارهێنانی کارەبا لە ساڵی ۲۰۲٤دا گەیشتە ۲.۸ ملیۆن کیلۆوات-کاتژمێر و نزیکەی ۸۰۰ تەن زبڵ و خاشاک بەرهەم هات.

نرخی یەک لیتر خواردنەوە (Maß) لە ساڵی ۲۰۲٥دا لە نێوان ۱٤.۵۰ تا ۱٥.۸۰ یۆرۆ دیاریکراوە.

کەلتووری زیندوو لە پۆشاک و مۆسیقادا
ئافرەتان بە پۆشاکی فۆلکلۆری Dirndl و پیاوان بە Lederhosenەوە لە خێمەکان و شەقامەکان ئامادەن؛ جلوبەرگێک کە هێمای شوناسی بایرنییە.

لە کەشی جەژنەکەدا، مۆسیقای باژەن (Blaskapelle) و گۆرانی وتن بە کۆمەڵ بە Ein Prosit دەنگ دەداتەوە. لەم ساتەدا، زمانی هاوبەشی شادی سنوورەکان دەسڕێتەوە.

خواردەمەنییەکان؛ تام و چێژی کەلتوور
لە Breznی گەرم و مریشکی برژاوەوە تا کۆنەقەرە بایرنییەکان (سۆسێج)، خواردنەکان لەم جەژنەدا تەنها ژەم نین؛ بەڵکوو بەشێکن لە یادەوەری کەلتووری و شێوازی ژیانی بایرن کە ئەمڕۆ لە دڵی شارێکی جیهانیدا پێشکەش دەکرێن.